玄奇世界＞玄學大講場＞玄學漫游﹣蔣文正＞新潮少女看相記

新潮少女看相記

蔣文正

時維一九八三年，癸亥年秋天；是日也，雲淡風輕，露台的花吹來芬香，聞得我鬼咁陶醉，聞得我詩興突然大發焉。

正想學人吟吓詩，思吓吟吓，吟吓又出詩，扮其文藝一番。 突然間電話鈴響，原來包頂頸先生約我飲茶，橫豎無事，會一會之可也。

既至茶樓，原來老包陪同一位小姐在座，鶯聲嚦嚦，相當美艷。

但聞得老包,「克咸」一聲道﹕老蔣，此位小姐，聞得你話識睇相算命，要來一試。 靈嘅，即管叫碗仔翅漱口可也；若果唔靈，就唔好怪我老包冇口德，唱到你瘀矣。

哈，包爺即是包爺，瓦風領包頂頸性格五十年不變，於是清下喉嚨，嘆啖普洱茶才曰︰包爺與小姐閣下聽著，鄙人練成之睇相算命功夫，好有一比，正如武功一樣，分軟功硬功，本人定之名為「天劍」與「絕刀」。 不知你想領教哪一種？

那小姐見在下有點語無論次，似乎黐咗綫，於是奇而問曰：何謂天劍？何謂絕刀？亦得聞乎？

嘩﹗有美垂問，敢言有不盡乎？於是順手招伙記落單叫定碗仔翅，以示信心十足。 然後演嘢﹕天劍者，本上天好生之德，永不趕盡殺絕。 雖然對手必定中招，但招招只中皮毛，例如講吓性格、愛好之類，加多兩錢讚美，俾一個好嘅遠景你憧憬一下，咁就包冇撞板。 再唔得就用「軍馬」辦法，套吓口風，用反客為主嘅辦法問番你轉頭，咁就皆大歡喜，笑吓收場。

不過絕刀就唔同，話明「絕刀」，那是招數不多，但正如武俠小說內之小李飛刀，例不虛發，中必核心，而且必定見血，即是要運用技術，探討至問題核心。 但有時連私人秘密都挖埋出來，所以就先此聲明，要受得刺激至得。

小姐與包爺齊聲曰︰願見絕刀亮招，甘願引頸受戮，先生操刀，絕不手軟可也。

哈，本人拈鬚頷首曰︰亦得亦得，先問芳齡。 答曰︰奴家虛齡二十。 於是連忙收懾心神，先掌後相，細細端詳，免碗仔翅要由背脊骨落也。

先看手掌，感情綫複雜，多心紋由尾指水星丘下開始直至中指土星丘下均多如垂柳。 左掌婚姻紋一上一下重叠成為千里姻緣綫，於十九歲流年位置橫飛而去，且現赤紅色顯示正在
蜜運中；金星丘與坎位一帶青藍筋明顯，健康綫卻並無異狀，此為正在服食避孕丸之狀況。

再觀面相，原來已非完璧處女身，因瞳孔已較正常處女擴大，眼睫毛發直，眉毛鬆散及額上黃毛均已改變，變為婦人之身久矣！

眼神帶桃花而現陶醉感，雙顴桃花喜色緋紅明顯，山根一抺青藍而與奸門相連而現通姦之色，特別顯得奸門一帶發黑。 鼻形為孩子鼻，準頭上翹而山根年壽低，嘴形不夠緊閉，乃自我控制力及意志力不夠堅強之人；而印堂命宮過度開闊，本主心胸廣闊，為人隨和，但卻過份至呈眉鬆目散現象，故亦可說得是為人隨便。 唔，心下有數，看刀來也。

在下一正衣襟問曰：小姐不怕包爺在座，有所顧忌乎？曰﹕不怕。 於是在下乃宣判曰﹕小姐虛齡十九之時，準頭對司空，揚名耀祖宗，是年必定工作上升級；不過因為生成孩子鼻及眉心部位之命宮過度開闊，皆為容易受騙之象，是年亦受騙失身。 於生日後百日，已經與你之外籍上司有染，目前為止，小姐己非完璧之身，且正在服食避孕藥丸。

奸門發黑，掌中坎位現藍筋，為避孕藥藥力過份猛烈之現象，加上你千里姻緣綫在此流年，現之情人必為外國人而且外貌英俊者。 而你眼現桃花而有陶醉感，說明現在之男友能說會道，正一嘴巴燙油之輩，甜言蜜語令你鬼咁受用。

不過你命宮過闊而呈眉目鬆散現象，故此，此段情只是一棵無花的果樹，對方必是愛情騙子，亦必飽食而遠颺，心理上要有預備也。

小姐驚曰：嘩，一切正如所言也，連發生時間都知道，我亞媽都唔知我咁多事，俾睇相佬洞穿哂，真犀利。 不過我正在享受目前，得快活時且快活，他日男友變心係他日之事，我早預之者矣，先生毋用擔心。 碗仔翅抵請你食，不知尚有興趣嘗其他之山珍海味乎？

在下抺一下嘴曰﹕一碗翅仔吃完，經己夠皮，非不為也，是不能也。 我之胃口只能容納咁多，若有任何關照，老包做我代理人可也。 只見老包眉開眼笑，狀若甚噱。 在下於是腳底抺油，一聲請請，便打道回府，繼續未完之吟哦去也。

不知怎的，大腦突然閉塞，吟哦不出，詩又冇，詞又冇，只得草此篇蕪文，以誌今日看相之奇逢。